बिके माकजू को कविता "बा नाउँको पुस्तक"

 बा नाउँको पुस्तक

एउटा सजीव किताब

जसमा थियो , जिन्दगीको हिसाब

पाना पल्टाएँ

हेरें

पढें

आँसुको लौरी टेकेर

पसिनाको खोल्सी तरेर

पहाड चढ्दा

रक्तिम मसीले गरेको

उकालीको जोड

ओरालीको घटाउ

समथरको गुणाण पाएँ

त्यो सजीव किताब भित्र

शब्द र अंक स - चित्र ।

पाना फेरी पल्टाएँ

केलाएँ

घामको छाता ओडेर

पटुकीले भोक कसेर

जिन्दगीको लगाम कस्दा

हत्केलाको फोका फुटेर प्रतिपादित

सुत्र भेटाएँ

पाइथा गोरसको भन्दा फरक

तर ,

जीवन जिउने सुत्र

सन्तान हुर्काउने

बढाउने

पढाउने

आफ्नै खुट्टामा सन्तान उभ्याउने सुत्र

त्यो सजीव किताब भित्र ।

अझै पाना पल्टाएँ

चित्र केलाएँ

अभावमा पिल्सिंदाको जस्तो

दुखमा रुमलिंदाको जस्तो

कोण भेटाएँ

त्रि -भुज

चतुर्भुज

सरल रेखा छंदै थिएन

त्यसैले , म रोएँ

भक्कानेर रोएँ

हेर्दै बक्र चक्र

त्यो सजीव किताब भित्र ।

म यसर्थ रोएँ

म बाको जीवन भोगाई पढ्दै थिएँ

मलाई जन्माए

सक्षम बनाए

मेरो लागि जीवन खर्चे

त्यही हिसाब हेर्दै थिएँ

सम्हाल्नै सकिन मैले आफुलाई

हेर्दै रोएँ , बाको अनुहारलाई

बाले गरेको दु:ख देखेर

म रोएँ भक्कानेर

ढोग्दै बाको चरण नतमस्तक

पढें मैले बा नाउँको पुस्तक

त्यो सजीव किताब भित्र

बालाई स - चित्र ।

    बिके माकजू , 

झौखेल भक्तपुर ।