कविता : जीवन र मृत्यु_दुर्गा राई ‘चामलिङ ’

जीवन र मृत्यु

जीवनको सङ्घरमा उभिएर कोर्र हानि बस्छ जिन्दगीले जिन्दगीलाई
एउटा जीवन मरुभूमिमा फुल्न खोज्छ
एउटा जीवन खहरेमा बग्न खोज्छ
विश्व बजारमा मनहरू जीवनको भाउ मोल तौल गरिबस्छ
सनसनी छ जीवनको बजारमा मृत्यु
जिजीविषामा जीवन चक्र हलिरहन्छ ।

हावा हलाउँदै जान्छ 
पानी बगाउँदै जान्छ 
पत्कार जस्तो जीवन
हावामा हलिन्छ 
पानीमा बहान्छ 
यत्र तत्र छर्पस्टिएको मृत्युहरू
उच्च जोखिममा त्रसित 
जीवन नयनहरू काकाकुल भइरहेछ ।

समय त्यही नै हो 
आफ्नो गतिमा बहिरहन्छ निरन्तर
जीवन चक्रपथमा लम्किरहेछ निरन्तर
फरक यति हो ...........फरक यति मात्र हो 
शभ्यताको होडमा जीवन शैली अस्त ब्यस्त  छ 
मानव त्रसित जीवन जिरहेछ ।

विश्व साझेदारीमा कर्पोरेट समाज 
आकाश छुने प्रतियोगिताको दौडमा लागिरहेछ
मृत्यु विजयको शङ्ख फुकिरहेछ 
परजित जीवन लम्पसर सडकमा लडिरहेछ  ।

दुर्गा राई ‘चामलिङ ’
डुवर्स, भारत